LKP péké pé !
Pèp-la sanblé pou fè on Lyannaj é nou di : Nou bon épi tout Pwofitasyon. I lè pou nou arété sa an péyi an nou.
Zòt di : Quand les nègres auront faim , ils reprendront le travail . Men nou di zòt ; awa! nou paka kriyé chyen bopè pou zo . é jous a jodi nou poko mò fen .
Zòt di : de toute facon , Konplo a nèg sé konplo a chyen . Men nou tout sav sé pawòl manti a mantè , davwa. , chyen paka fè chat .
Zòt di : la dignité est une nourriture que les nègres ne digerent pas . Men nou fè zòt konpwann ki , filozofi a chyen sé zaboka pouwi .
alòs zòt paté pé tann plis , é zòt voyé manblo pou di nou : Pé !
nou di : AWA !
LKP péké Pé paskè nou pa pè . pwan pawòl-la jan zòt vlé , Men nou péké pé.
Nou pa pè kolonialis rasis ni manblo a zòt . Davwa nou ja paré . Nou sav ka zòt yé , nou ja vwè sa zòt pé fè lè zòt Pépa . Sonjé mé 67 ! Zòt paté pé fè nou pé , alòs zòt voyé manblo a zòt pou pété tchou a pèp-la , pou té fè-y pé. Zòt vlépa réglé pwoblèm LKP pozé pou détòtyé péyi an-nou anba pwofitasyon, alòs zòt vlé fè nou arété palé pawòl vérité .
men sav ki , LKP péké pé .
LKP dékouvè manjékochon a èsklavajis an konplosité épi kolonialis rasis ki ka okipé péyi an nou épi manblo é "jistis" a zòt .
Zòt tout sé pwofitasyonis-la-sa ké péyé tout lajan zòt dwé pèp-la dèpi nanninannan jous a jodijou . sou pa sou . sou pa sou . sou pa sou . men zòt ké péyé-y jous a dènyé sou-la . Alòs zòt pé fè sa zòt vlé , men , LKP péké pé ! L . K . P péké pé ! pwan pawòl-la jan zòt vlé . men nou ja pwan asé . é nou péké pwan pon kalité béké fè sa yo vlé an péyi an nou .
Nou paré pou arété sa !
nou péké pé ankò ! Pwan-y jan zòt vlé , men LKP péké pé .
zòt fè nou pè é pé tro lontan . zòt fè nou konpwann ki nou paté pé . é zòt fè tousa zòt té pé pou té fè nou konpwann ki nou péké pas nou pépa . é menm lè zòt di " ensemble tout devient possible " , zòt mèt nou apa . pas zòt di , zòt péké pé épi nou .
Menmsi onlo adan nou té sav nou té pé san zòt , men nou konpwann ki pèp-la patéko paré , pas yo té pè. davwa zòt lagé an tandé a pèp-la , fò nou pé pas nou pépa . é sé yenky zòt ki pé pou nou.
jouskatan on boug sòti la y sòti é y hélé : Yes we can ! zòt tout viré gadé-y , zòt vwè-y nwè , é zòt di, "awa misié pépa".
Y wou-hélé Yes we can ! Fòs y wouklé , onlo adan zòt ki téka di y pépa ,bigidi , zòt tchoulé dèyè . Zòt pwan pè , paskè zòt vwè, misié paté paré pé .
é sé lè zòt konpwann ki Nonm-la-sa téja konpwann y té pé pas y paté pè. Mi bab ! zòt tout ozabwa é zòt pwan pè , lè zòt tann "Yes we can !" dé mo kat pawòl a nonm ki té pé é ki paté pè pou té ay pété chenn pou Libérasyon a Konsyans a Pèp .
Yes we can ! sé pouki LKP péké pé .
Sé pouki , moun ki ka Mandé lanmou é lapé san mandé jistis , péké jen pé sipòté LKP pas LKP péké jen pé .