8- Masoto , nèg mawon é rèstan-la .(mòso 8)


Napoléon désidé rétabli lòd adan tout koloni a-y . É pousa , y voyé onpakèt lawmé a-y an tout koloni fwansé a réjion mériken , la ki té ni pwoblèm . Napoléyon voyé 30 000 sòlda fwansé a sendomeng anba lòd a Leclerc , é y voyé 4000 an koloni gwadloup anba lòd a Richepanse . Sé boug-la vin rétablir l'ordre dans les colonies. Kivlédi mèt chak moun an plas yo dwèt yé é èkstèwminé tousa ki ka nòz lévé tèt a yo .

Rivé richepanse rivé , y téja tini on konpòwtasyon a èsklavajis . Y patéka pwan pélaj , ignas , dèlgrès é rèstan milat , métis é nèg bytasyon a lawmé fwansé pou ahak malgré tousa mannèv sé nonm-la-sa té pòté pou la patrie té woupwan zil gwadloup an men a lawmé èsklavajis anglé .

Richepanse téka fè onlo gòj asi sé boug-la , é tout lawmé a-y téja enstalé yo an plas a sé sòlda nèg-la , san ba yo pon èsplikasyon .

Épi lèlandèmen gran bonè , Richepanse samblé tout sé sòlda a koloni gwadloup-la , pou té palé ba yo .
Y di yo :
_ Napoléon Bonaparte , Prèmyé konsil a enpiw fwansé , voyé mwen an koloni Gwadloup pou mwen pésa  wou-òwganizé péyi-la , é " rétablir l'ordre " an koloni-la . Kon- y yé-la , tout sòlda a lawmé fwansé a koloni gwadloup ké asou otorité an mwen .
Kon zòt sav , lagè ja fin antrè lawmé kolonial anglé épi lawmé a répiblik fwansé .
Sé pouki , pwèmyé konsil , Napoléon Bonaparte ka mandé zòt tout sé solda a koloni-la , rèmèt tout  fizi , tout awm é inifòm a zòt . É pwèmyé konsil Napoléon désidé afèkté zòt adan dòt travay ki ni a fè an koloni-la . 

An désidé gadé pélaj adan pòs la y yé la , é an kay fè-y ban mwen on lis a dewotwa  sòlda adan zòt , pou nou pésa gadé  yo épi nou . Davwa zòt konnèt koloni-la é moun a koloni-la byen . Évè , nou ké woupwan tout sé "Métropolitain"-la , davwa pani ahak ki ka liyanné yo épi koloni-la . 

An ka ba Zòt 2 jou pou zòt pésa woumèt tousa nou té pwété zòt . é Siwvè adan 2 jou yonn adan zòt pa rèmèt fizi é rèstan awm yo ni  é léta fwansé té mèt a dispozisyon a yo , nou ké konsidéré yo , konsi yo sé òwlalwa . é pou sa , nou ké jijé yo é nou ké fiziyé yo .
adan 3 jou , kivlédi , lè pélaj ké ban mwen lis a toumoun nou ké gadé andidan lawmé -la , an ké sanblé zòt , é an ké bay non a yo . É rèstan , nou ké voyé yo travay adan èspwatasyon a kann , kakawo , kafé  , ki pwèmyé konsil Napoléon Bonaparte kay mèt an plas .

An pépa lésé zòt pati san di zòt . Pwèmyé konsi fwansé , Napoléon Bonaparte  ka di zòt tout ki la , mèsi pou sèwvis zòt rann drapo fwansé . .

delgres ki té sòti jous an kazèn bastè a zil gwadloup pou té monté lapwent kouté pou tann ki kamo richepanse té pòté an koloni-la , potoko jen sibi imiliasyon kon tala , an tout vi a metis lib a-y .
dèlgres paté sav fè dòt byten ki sèvi lawmé kolonial fwansé . é jòdi , y santi , é y konpwann on byten tékay kalbandé an péyi-la . Sa ki menné-y a wouvè on gran lawond épi pélaj , ignas , jaquet , massoteau , é restan métis , milat é nèg bytasyon a lawmé kolonial-la. sété pou yo té pésa palé asi tousa Richepanse té deklaré-la .

dèlgres di : An paka konpwann pouki lawmé a léta fwansé ka voyé 4000 sòlda fwansé an koloni-la pou pésa di nou , tini twòp sòlda andidan lawmé kolonial gwadloup .

delgres di ankò : richepense ka mandé nou rimet awm an nou , é ay travail tè davwa lagè ja bout . Men an menm balan-la , y ka voyé 4000 sòlda an koloni la , é y ka di sé pou rétablir l'ordre . Men ki lòd ésa ?  ès nou ki fouté kolonialis anglé déwò an péyi-la , nou pa kapab rétabli lòd an koloni-la ?
mésié , fè nou chèché sav ki lentansyon a sé moun-la-sa . davwa yo pa vin an péyi la pou tousa yo ka fè nou konpwann-la .

Mwen delgres , an ka di zòt ki lentansyon a Richepanse .  Boug-la -sa sé on vèwmin . Y vin kotésit , yenky pou met nou déwò an lawmé a-y . Lè y ka di tini twòp moun an lawmé-a fwansé , y vlé palé dè nèg . Tini twop nèg an lawmé kolonial fwansé . mi sé sa y vlé di nou . davwa sa ka fè yo pè . Alòs , yo pisimyé fouté nou an tè la , pou nou travay ba yo , kon yo fè manman nou é pap'an nou . mi lentansyon a yo . yo vlé fouté nèg an lèsklavaj ankò .

Dèmen an ka wouviré an kazèn bastè asi zil gwadloup , pou men pésa ba sòlda an mwen dékatman a sa mwen tann jodi . é an ka mandé zòt rété véyatif asi konpòwtasyon a richepense é bann rasis a-y la-sa .

Rèstan-la . . .

Gégé    knouye.over-blog com

É sé Éliz ki èspliké ki sé sòsyé sé blan-la fè tout sé nèg-la-sa . Éliz téka èspliké Masoto é rèstan nèg mawon-la : An kijan Sé blan-la ka fè sé nèg la rantré adan on gran kaz blan , ki ni onlo gran istati a moun blan , sé blan la ka palé an kaz-la-sa on lang ponmoun paka konpwann , yo ka voyé dlo asi-w , yo ka ba-w bwè san a yo , yo ka ba-w manjé on byten ki ka sanm pen , é lè-w sòti an gran kaz blan-la-sa , ou ka santi-w on dòt jan . Ou ka santi kò a-w chanjé . Konsi yo té ba-w lèspwi a on dòt moun . Mannyòk ki téka pasé pwès tout tan-ay ka étidié tout alé é vini é  tout konpòwtasyon a kalité  sosyété a nèg bitasyon-la-sa , hélé : Sé vwé a Man Éliz . non a gran kaz-la-sa sé on légliz . É sé adan gran kaz blan-la-sa onlo nèg adan nou pèd non-la manman-yo té chwazi ba yo-la . É sé osi akòz a légliz kifè si jodi onlo nèg pa konnèt ola yo sòti ,ka yo yé , ka ki papa-yo ,  é yo ka jous kriyé blan-la papa . Sé nèg bitasyon-la sé Zonbi !   sé gran kaz blan a istati blan-la ka tchouyé nanm a fwé é sè an nou . sé pouki sé nèg bytasyon-la tini ondòt konpòwtasyon ki nou . É Bouwo-la ki té sizé pli lwen asi on rasin a bwa pou filé on sab a-y , doubout-pikan onsèl kou , é y hélé . Mi sé sa ki Zatrap a yo ! fò nou fouté difé adan tousa ! Tout nèg mawon ka hélé , toumoun ka babyé , é sé konsa yo désidé fouté difé adan tout légliz yo té kontré . sété pou pwotéjé sé nèg bytasyon-la , kont sòsyé a blan ki téka kolonizé lèspwi a yo .


Toupannan lavi téka kontinié woulé an péyi-la , Masoto é bannélo a-y téka fè moun palè di yo dè plisa plis .davwa pitiapiti sé nèg mawon-la téka éliminé onlo nèg a blan ki téka fè yo chyé , yo téka krazé tout byten ki té an lyannaj épi kolonialis é nèg ki téka pòté inifòm a lawmé èsklavajis-la . Yo téka bwilé onlo légliz , yo téka baré tout chimen pou té anpéché komès fèt asi do a pèp-la , yo téka krazé é bwilé tout plantasyon . Yo téka di , si kolonialis-la paté pé fè komès an péyi-la , y ké chapé kò a-y . Métòd a Masoto , Tèwtilien , bouwo-la , Irèn é bannélo a yo paté popilè obò sé nèg bytasyon-la , davwa gouvèlman néokolonial-la patéka péyé-sé nèg bitasyon-la siwvwè sé plantasyon-la té bwilé. é sa , menmsi yo té travay kon bèt . Masoto ,Irèn ,Tètilien é sé nèg mawon-la téka pwan sé nèg bytasyon-la é ékonomi a mòso koloni-la an otaj . ignas , dèlgrès ,massoteau , pélaj pépa fè ahak davwa lagè pété ankò an zil gwadloup . métis , milat é nèg bytasyon a lawmé fwansé an lagè ansanm ansanm épi kolonialis fwansé kont kolonialis anglé . kifè , Péyi-la opiyaj tout nèg bytasyon é métis ka lévé gawoulé kont Irèn , Masoto , Mannyòk é konbatan ba diniyté a nèg . Mi sé konsa gouvèlman a koloni gwadloup a fwansé asou lòd a pélaj mandé pèp-la lévé goumé kont sé nèg mawon-la . Gouvèlman bwabwa gwadloup évè an tèt a-y pélaj , di : Pour rétablir l 'ordre en Guadeloupe .

Toumoun an péyi-la té konnèt Masoto . Yo tout téka palé yenki dè Masoto épi bannélo a-y . Tout kolonialis yo té touvé mò , yo téka di sé Masoto ki tchouyé-y . Tout piès-kann ki té bwilé , yo téka di sété Masoto . Tout boukèt oben chouval yo té touvé mò , Masoto . Tousa ki té fèt an lanmè sété réken . Masoto é sé nèg mawon-la sété malmaké , kangarè an zyé a pèp nèg krétien-la. Gouvèlman fwansé a pélaj é dèlgrès téjaka fè sikilè pasé pou té mandé moun goumé kont sé mové sijé-la-sa . Tout labé an tout légliz téka fèt Masoto é bannélo a-y pasé pou pitit a Satan .


Men pannasitan ,
Konba ka fè raj antrè lawmé kolonial anglé ki ka goumé kont lawmé kolonial fwansé ki tini an tèt a-y onlo métis . Lawmé kolonial anglé ki téja réisi enstalé-y asi zil gwadloup , ka pèd téren pitiapiti gras a stratéji pélaj , ignas épi dèlgrès té mèt an plas , yo fè anglé tchoulé , tchoulé , tchoulé dèyè joustan yo té oblijé woupwan lanmè ba yo . é an menm bala-la , chayé tout béké épi yo , pou té ay chwé an koloni matnik a anglé .
Stratéji dèlgres ignas é pélaj téka mèt an plas pou té goumé kont sé kolonialis anglé-la , enpwésyoné sé lawmé blan fwansé-la ki téka goumé tètkolé évè sé kalité nèg-la-sa . Ki fè , yo téka jous vin mandé konsèy koté dèlgrès , ignace , pélage pou té konnèt tèknik a yo .
Tout goumé anglé goumé kont lawmé fwansé a koloni gwadloup , yo pa jen réyisi woupwan koloni-la é gannyé lagè-la-sa . É sé konsa bann-zil gwadloup wou-vin asi kontwòl a lawmé kolonial fwansé .

Men a 8000km a koloni gwadloup , an péyi fwansé, kalbandaj a pouvwa patoko bout . É sé konsa nou vwè , yonn dé lanné apwé revolisyon fwansé téja bout , idòl a dèlgrès ,yo ka kriyé général NAPOLEON , vin ranté o pouvwa an kokann .

Mòsofè-la épi zanmi a-y té fou pèp fwansé on koutchanm asi pouvwa-la . É zanmi vòlè ay mété Napoléon pwoumié konsil a péyi fwansé .

Rèstan-la . . .

Gégé    knouye.over-blog com

Lè victor Hugues rivé an koloni-la , téja tini asi laplas on gran sanblé a nèg bytasyon ki yo té fè vin pou té wousouvwè-y , é Hugues déklaré douvan pèp-la : Léta fwansé aboli lèsklavaj a nèg an tout koloni a-y . Kon-y-yé-la , tout nèg lib .  é alèla , yo ni menm dwa ki on fwansé  kivlédi on blan . I di sé nèg-la : Alèkilé Zot lib fè sa zòt vlé .

Si zòt vlé travay ba léta fwansé , yo ké péyé zòt pou travay a zòt . Tout nèg bytasyon té kontan . Yo tout téka hélé woulo ba Victor Hugues . Victor Hugues di sé nèg bytasyon-la : _Péyi fwansé , ki sé péyi a zòt alèkilé , an lagè kont kolonialis anglé ki vlé wou-fou zòt an lèsklavaj . é mwen , an vin an koloni gwadloup , sé pou mwen pé défann dwa a zòt . men pwoblèm-la , an pani asé moun an lawmé fwansé pou goumé kont sé èsklavajis anglé-la é zanmi béké a yo . sé pouki pélaj , delgres , ignas pwopozé mwen fè zòt rantré an lawmé fwansé pou zòt pésa goumé pou libèté a zòt kont lènmi anglé a zòt . si zòt vlé rantré an lawmé fwansé , fè zòt ay vwè ignace , dèlgrès , oben pélaj , davwa sé yo ki ké chèf a zòt .

É apwé ki Victor Hugues té lagé on pakèt méday anlè fal a pélaj , dèlgrès é ignace , an mitan a onlo moso mizik fwansé , Victor Hugues di sé nèg bytasyon-la . _Léta fwansé ka rèspèkté kouwaj a dèlgrès , ignace é pélaj . lè yo ka goumé kont lawmé èsklavajis anglé , nou ka vwè ankijan yo paré sakrifié vi a yo pou léta fwansé .  é moun kon sé mésié , léta fwansé ké toujou ni yo an bon-tchè a-y . pélaj , ignace , dèlgres , léta  fwansé ka di zòt mèsi pou tousa zòt ka fè ba-y.  Léta fwansé ka pòté lonè é rispè ba zòt . Tout nèg bytasyon mété yo ka watché lanmen . Yo tout té kontan . Menm sa ki pa konpwan té kontan .

dèlgrès sété on milat matnik . Kivlédi sé on blan é on nèg matnik ki chié-y . Misié fèt lib davwa sé moun la ki fè-y la té lib . Y vwè nèg an èsklavaj , men limenm pa jenmen sibi sé kalité trètman-la-sa . Dayè pou yonn , y téka rété lwen a sé moun-la-sa , pou ponmoun paté pwan-y pou on èsklav.

Rèstan-la . . .


Gégé    knouye.over-blog com

2- Masoto , nèg mawon é rèstan-la ( mòso 2)

Masoto paté ka sipoté vwè fwè nèg "afwiken-ay" fè "zanmi" épi sé béké é kolonialis-la . É lè y téka vwè oben tann on fwè-a-y téka fè kon sé blan-la , sa téka fè-y lévé gawoulé é dlo téka menm sòti an zyé-ay , tèlman sé makak-la-sa téka fou-y anrajé .

Masoto té lyanné épi on fanm milatrès yo téka kriyé Irèn . Irèn sété on fanm a mantalité a Masoto é sé pousa li é Masoto , yo téka tonbé dakò . Si ba détwa moun , Irèn sété on pitit a on nonm blan , é yo té toujou ka voyé ti pawòl-la-sa ba-y , masoto patéka vwè sa konsa .

Pou Masoto koulè blan-la ki téka kouvè tibwen koulè nwè a irèn , sété on sikatrys ki téka devwalé tout listwa , pwofitsyon , imiliasyon é soufwans Irèn é manman-y té sibi . Irèn sété fi a on fanm nègrès èsklav béké té violé . Irèn paté byen konnèt manman-y , davwa manman-y mò a 17 lanné anba viòl pawtouz é maltrétans a béké é kolonialis .

sé on zanmi-a-soufwans a manman Irèn ki lévé-y adan on bytasyon zabym joustan Irèn té chapé kò-ay gras a Masoto . Men sété  apwé déwotwa viòl é fòskouch ki té rivé-y an bitasyon-la-sa .

Irèn té kontré Masoto on jou avan lannwit té tonbé . Irèn té ay chèché dlo ba "métrès-a-y" adan on ma , twota té baré-y , é Irèn té jwenn épi on vyé béké asi on kabwèt ki Masoto téka véyé anba bwa-la pou té woté-sa asi latè .
Vyé béké-la té rété pou té pwan Irèn an istop , men jennfi-la patoko menm fin monté an kabwèt-la , on anvi a koké vin an lèspwi a vyé béké-la , é y téja soté asi jenfi-la pou té violé-y dèyè kabwèt-la . Men Masoto ki té la . . . . .  .   . É tout pwoblèm réglé . É sé konsa Irèn chapé kò-ay épi Masoto , pou té ay jwenn anba bwa-la , tout rèstan nèg mawon kon Tèwtilien , yo téka kriyé-y kapitèn . Sété on boug ki té chapé kò-ay adan on bitasyon pa koté lamanten  oben  sentwòz .  Misié té réisi sanblé on dizèn nèg ki té mawon

bitasyon a yo sé koté-la-sa . Yo té volé on kanno pou té chapé kò a yo pou KAMA . Davwa yo té konpwann KAMA sété atèlala . Yo ponyonn potoko pwan lanmè  . É sé gras a kapitèn ki fè yo ay chwé pòwlwi , é anba bwa-la , yo vin tandé son a KA-la ki chayé yo koté Masoto épi bannélo a-y . Lè kapitèn é bann a-y

jwenn épi Masoto é bannélo nèg mawon a-y , yo konpwann yo té rivé KAMA é yo koumansé palé onlo wanniwannan ponmoun paka konpwann . Ki fè , lè sé nèg mawon-la konpwann sa ki té rivé , yo mété yo ka fouté jé an tchou a sé boug-la .


Té tini Éliz : Haaa man Éliz ! Eliz sété on fanm ki té vwè jou pa asi koté marigalant . Fanm-la-sa pasé pwès tout bitasyon marigalant gwadloup é granntè . Sé Éliz ki té pli vyé adan tout sé nèg mawon-la .é pousa toumoun téka rèspèkté man Éliz é pawòl-ay . Davwa y téja vwè onlo onlo byten an gran vi-ay .
Man Éliz sété on bèl gwo madanm . Lè-w téka gadé-y , ou téké di mizè potoko jen vwè jou anlè-y . Men pakonnèt mové . Gran madanm-la sété on fanm a ras . On fanm ki téja pasé onpakèt penn . Man Éliz téka rakonté chak lè moun téka kouté-y , mizè y vwè anba jouk a béké ki-y téka sèvi . Y patéka las palé dè 12 timoun ki-y té fè é ki y pa jen vwè yo pon-yonn grandi . Béké téka foukan épi yo tout dèpi yo té ni apenn 2 lanné . É y pa jenmen konnèt sa yo divini . Man Éliz téka di , y fè timoun ba blan ki violé-y é y fè ba nèg é milat y té enmé . É sé pouki y téka kriyé yo tout sé nèg mawon la ki té anba bwa la , "Pitit a manman".  Té tini onlo nèg mawon an bwa la ki paté konnèt ka ki fanmi a yo , é yo téka konsidéré man Éliz kon manman-yo . Lè on nèg mawon téni on lenbé oben malad , sé man Éliz ki téka ba-y fòs kontinié viv .


Rèstan-la . . .

Gégé         knouye.over-blog com

7è  épi Sarko , sété onsèl manjékochon

Toumoun téja avèti . Si zòt paka manjé kochoni , pa ay adan nòs a gligli .
Men ka-w vlé fè ?  Sé Pwofitasyon ki ka nouwi l'ignorance . é an koloni-la ,sé l'ignorance ki ka gouvèné pèp-la . é l'ignorance pépa viv san  pwofitasyon . davwa YO an Liyannaj  POU . 
Sé pouki , an koloni-la , pèp-la toujou manjé kakapoul pou bè . é menmsi zyé a on chay a pèp-la vin wouvè ,  sèten péké pétèt ba onlo  , kakapoul ké rété bè . Davwa yo pavlé dòt bè ki sa kòk golwa-la ka chié ba yo . alòs kòk ké anbè a-y toutan pèp-la ké kontiniyé voyé monté bwabwa dirgonflis Gwada . ki akoko si do an nou ,  ka jwé on politik a manawa , sa ki ka fè tout pèp-la pasé pou kolokèt a kòk golwa-la , é ka , fè kòk-la jwi di pwofitasyon . mi sé pouki fò nou konpwann ki , l'ignorance ka nouwi-y gras a pwofitasyon ki mété pèp a péyi-la an kakakòk  . 

Pannan 7èd tan-la y pasé-la , an rété gadé dékatman a bwana sarko é banélo ki vin pou ban nou on ti lèson moral akòz a on konpòwtasyon bankal ki nou téké tini  adan koloni-la . té tini chantè é dansè Tam-Tam  ki téka atann-li , é té tini lé matadò ki té la pou fè bò kon bòbò , pou voyé bo ba bwana sarko é banélo . Tout byten pasé byen .

Sé doudou-la té la osi . toumoun-la té kontan . yo té "Heureux" . an vwè Toto ka voyé onlo ti-flè ba fi a man micho , é man micho kanta-y téka lagé on ti-bo , dé ti-bo , twa ti-bo an dousin ba doudou WW a-y ki sé Toto , é tousa anba dé kokozyé a jilo kabo a Toto ki la kon mako , nonm-la doubout kon on vigil koté sarko ki ka éséyé fè détwa pa asi on son a TaM-TaM .  
apwé tout bonbansaj bout , Ansanm-ansanm adan on gran lawond , bwana épi bwabwa gwada fè on Liyannaj POU on gwo konvwa a matadò  .

Adan gran Liyannaj-Pou   la-sa , YO paté pé pala . Davwa yonn pakay san lòt . é adan YO , té tini MEDEF , CGPME , BEKE , "METROPOLITAIN" , MALMAKE , épi yonn dé boloko loko ki té la ka fè "le beau "adan on wòl a bonobo  kon an labitid a sé "ignorant "la sa .

Lè Toto , micho , jilo , sarko é rèstan palo bout épi tout pawòl pou-ri a YO , onlo té kontan men té tini dé tètalak adan asistans-la ki konpwan ki tout lokans-la-sa , sété blag a mas . sé kon pawòl-la ka di , fè-w touné on pawòl an djèl a-w 7 fwa avan ou lagé-y , sé menm byten , fo-w kalbandé on pawòl an tandinèt-a-w on chay fwa avan-w di ou konpwann . davwa lang a sé mésié sé lang a sèwpan kivlédi pwazon a manglous tif . chak pawòl a YO ka kaché on pwofitasyon asi pèp-la.

Sa patéka anpéché lé gwo lolo , lé boloko lé pli bwak a asistans-la watché lanmen a 2 men san menm sonjé a dèmen a pitit a yo .  Adan on péyi a pwofitasyon , lé boloko bòklè ka kwè adan libèté égalité fwatèwnité a YO . "l'ignorance" sé pli gwan lènmi a tout ignorant boloko . davwa si yo pou YO , sé davwa yo pa sav K nou Yé POU YO .
men si yo sav k nou yé an zyé a YO , é yo épi YO , sé davwa lé bonobo vlé vin kon YO . men yo pé toujou kouwi davwa " c'est pas possible" yo pépa vin kon YO .  yo ké on zouti a YO  an systèm a YO , kon BONGO avan yo , kon BOKASA , AMINDADA , é MOBUTU-SESESEKO avan yo , kon EBOUE avan yo , kon PELAJ an tan a lèsklavaj , tout sé kalité boloko-la-sa fouté pèp a yo onlo fè , é téka vénéré YO é Systèm a YO ki an finaldikont fou yo on manman palaviré malgré tousa yo fè pou yo té vin kon YO .


L'ignorance pépa ni mémwa .

men jodijou ,
_lè-w ka tann on boloko ka di : y ja lè pou tout deboulé a LKP pé an péyi .

_lè YO ka di : y lè pou tout byten wouvin kon y té yé avan 2O janvier 2OO9 . é YO ka mandé " Le Guide Supreme" Sarko dékalbandé é woumété lòd an Koloni-la . 

_lè ou ka tann Victorin ka di : fò YO woukonstwi sa LKP dékonstwi .  

_lè-w ka  tann menm Toto-la , bwabwa politik a YO ki pani lansèt afwiken-gwadloupéyen , ka mandé Gwadloupéyen arété sonjé é palé asi  tout pwofitasyon é imiliasyon a esklavaj é kolonizasyon sa ki rivé lansèt afwiken an nou an koloni-la anba jouk a fwansé kolonialis rasis bawbaw violè pédofil volè . . . a tan-lasa, é ki patri fwansé a YO wouba sé menm YO la-sa , lajan pou kontinié jouké pèp Gwadloup anba pwofitasyon a YO .
 
_lè nou ka tann sarko ka di douvan asistans a nèg boloko : y ké oblijé woukoumansé ba Gwadloupeyen fwèt siwvwè  pèp-la ka rifizé jouké anba pwofitasyon . 

_lè nou ka tann micho ka hélé woulo padavwa sarko ba fi a-y véyié kon kapo asi la colonie .

an finaldikont ,les nou gadé, nou ka konstaté ki sé l'ignorance ki ka kiltivé pwofitasyon , davwa sé gras a l'ignorance ki fè pwofitasyon ka kontinyé èkzisté an koloni-la. 



                                                                                                  Ignorance asi ka nou yé      Kanouye.over-blog