KOBA Maèwnès pap . Nou pwan Yo !
tout nèg a blan anlè ! on nèg vin pap . KOBA Maèwnès vin pwèmyé nèg Pap .
Imajiné dèmen Monsényè KOBA téké an pozisyon di-vin Pap . kivlédi pwoumié ripwésantan a yonn adan lé dé pli gwo rèlijion ki tini asi latè .
Alòs ! Monsényè KOBA monté an grad. pap ! . Y sòti gwada pou-y siéjé o vatikan. pap !, lè-w kadé pap !. Déwotwa grad apwé, Pap-la mò , yo voté. pap ! é yo mèt KOBA Maèwnès Pap a relijion katolik .
ka sa kay chanjé ba moun gwada ?! Ka sa kay chanjé ba nèg asi latè ?! ka Maèwnès KOBA téké pé poté dè bon ba pèp kamit-la .
An paka mèt an kòz entélijans ni konésans ni konnètfè a ansyen Monsényè a Gwada. Senten pa pétè, misié konnèt on tchò byten . Misié konnèt liv a rèlijion krétien-ay , y konnèt tout listwa a léta vatikan , é y ké kapab réponn asi tout sijè ki an lyannaj épi relijion kretien an jénéral .Y fè onlo lékòl adan-sa é pou-sa . é Monsényè jéré diosèz-ay byen an gwada , alòs pani pon rézon pou-y pépa dirijé vatikan kon jan-pòl II fè-y avan-li . Davwan y pa pli boloko ki rèstan "frère"-ay .
Men , rèlijion katolik , dèpi déwotwa tan koumansé pèd onlo fidèl . é mwens an mwens moun kay légliz , kifè rèlijion la ka pèd kòt . Onlo moun kay adan dòt rèlijion , é adan yo tini onpakèt ki kay aka sé mizilman-la . é sé konsa an gwada onlo Pierre , John , Ary vin touné an Mohamed é Djawad. tini plis an plis nèg Afwiken ki ka touné rèlijion katolik do , pou yo fouwé kò a yo aka sé mizilman-la ki sé menm bèt menm pwèl . é dòt ankò . Nèg sé pwoumié pli gwo sipòtè a religion katolik é Krétien an jénéral . Rèlijion katolik , dèpi nanninannan , toujou fè tout richès-ay asi do a moun. sé moun la ka ba "jézi" tousa yo ni pou yo ni "la vie éternelle" . sé sa "y" promèt yo . Davwa rèlijion-la ka di-w " fè-w bay pou bondyé ba-w . Si y pani nèg ankò pou sèvi rèlijion-la-sa mako , rèlijion-la-sa péké vo ahak ankò . Y ké an kakakòk . é sé pouki , yo désidé ba rèlijion-la on séwyé kout-fwèt pou fè-y vansé é sé pouki yo chwazi fouwé an tèt a gouvèlman a yo Monsényè Maèwnès KOBA .On nomm toujou o konba .
|
|
Ni moun ki poko konpwann , ké di: " Relijion katolik apa on relijion a blan davwa tini tout kalité ras adan sa , é si ou gadé bien ou ké vwè ki tini mwens blan adan ki sé rèstan ras-la ."
Sé sé menm moun-la-sa ki ka di-w: " Nasyon étazini apa on péyi a blan davwa tini tout kalité ras é sé zendyen-mériken ki té la avan ."
Ni moun ké di san yo sav : " élèksyon a Monsényè KOBA an tèt a rèlijion-la-sa ké ba nèg plis enpòtans an zyé a dòt moun asi latè . Moun ké rispèkté nèg plis ."
Sé sé menm-la ki ka di : "Si on nèg pwézidan a étazini , nèg ké pwan valè an zyé a moun , moun ké lévé nèg plis digrad ."
Ni moun ké konté onlo titinbwasèt asi élèksyon a Monsényè "an nou" .
NOU PWAN YO ! , sé sa toumoun , nèg kon blan ka hélé lè-w vwè KOBA Maèwnès Vin Pap . NICOLAS XXXIX sé nouvo non-ay . Ni moun ka di ki-y chwazy non-la-sa davwa mysyé té malad a on foutbalè ki tini menm non-la-sa . é ni dòt ka di apa ba misié y chwazi non la sa davwa foutbalè-la-sa fouwé kò-ay mizilman. Men sé pito pou fè nèg obliyé on dòt pap ki yo téka kriyé NICOLAS V , é sé Pap-la-sa ki ba blan dwa fouté nèg an lèsklavaj é fè komès a nèg . é misié kité on mové limaj a rèlijion-la-sa an lèspwi a nèg ki ka mawon rèlijion-la.
Toumoun ka hélé NOU PWAN YO ! Men kimoun ki pwan kimoun ?
Tout nèg a blan ka di , nou pwan yo ! davwa pou-yo , nèg réisi a vin an systèm-la , moun égal mòdan épi blan . Yo ka di alèla sé nèg ki ka voyé douvan rèlijion katolik . Ni dòt nèg ka di , sa ké ba yo on pli bèl imaj a légliz katolik , ni dòt nèg ka di yo téja rété ay lanmès , alèla sa kay ba yo gou wouvin an légliz-la .
Ni on dòt pati ka kriyé nou pwan yo ! Davwan sé blan-la ka di , yo kay woukoumansé pwan lèspwi a nèg épi dòt pèp an zatrap a yo , richès kay wourantré an "byten" a yo , matris Oksidantal-la kay pwan plis fòs pou dékatiyé dòt systèm , davwa plis dòt moun a dot systèm ka rantré adan-y plis sa ka bay fòs é ka fébli matris a lòt-la ki téja tou flègèdè .
An finaldikont , Nicolas XXXIX péké woulé ba nèg , men ké plito woulé pou nèg rantré anba jouk a systèm anti-kamit a pèp anti-kamit-la .
An vérité an ka di zòt élèksyon a kOBA MAèwnès an tèt a rèlijion pli djòk asi latè sé on gwo kabouya ba tout nèg é dòt pèp ki poko konpwann fondal a systèm-la-sa.
knouye.over-blog.com -